ٽرمپ ايندڙ هفتي نيتن ياهو سان ملاقات ڪندو: غزه، ايران، سياسي بحران تي بحث ٿيڻ جو امڪان

واشنگٽن:(اڱارو 01 جولاءِ 2025ع)آمريڪي صدر ڊونلڊ ٽرمپ ايندڙ سومر تي وائيٽ هائوس ۾ اسرائيلي وزيراعظم بنجمن نيتن ياهو سان ملاقات ڪندو، جنهن ۾ غزه ۾ جنگ جي خاتمي، جنگ بندي ۽ يرغمالين جي آزادي تي بحث مباحثن جي توقع آهي. ڊونلڊ ٽرمپ جي جنوري 2025 ۾ صدر جي حيثيت سان ٻئي دور جو حلف کڻڻ کان پوءِ هي نيتن ياهو جو ٽيون دورو آهي. ڊونلڊ ٽرمپ گذريل جمعي تي چيو هو ته هو يقين رکي ٿو ته اسان ايندڙ هفتي اندر جنگ بندي جو مقصد حاصل ڪنداسين، پر هن ان حوالي سان وڌيڪ تفصيل ڏيڻ کان پاسو ڪيو. ٻئي طرف، غزه ۾ اڃا تائين 50 يرغمال آهن جيڪي اسرائيل سان تعلق رکن ٿا. بهرحال، ڪو به نٿو ڄاڻي ته اهي زنده آهن يا مئل. ظاهري طور تي، ٽرمپ نيتن ياهو جي ڪاررواين کان خوش ناهي، پر هو غزه ۽ ايران سان جنگ ۾ اسرائيلي وزيراعظم جي مڪمل حمايت ڪري رهيو آهي، کيس هٿيار فراهم ڪري رهيو آهي ۽ اسرائيل ۾ نيتن ياهو خلاف جاري ڪيسن جي خلاف هڪ بيان به جاري ڪيو آهي. آمريڪا اسرائيل کي 510 ملين ڊالر جا هٿيار فراهم ڪندو آمريڪي اسٽيٽ ڊپارٽمينٽ اسرائيل لاءِ 510 ملين ڊالر جي نئين هٿيارن جي خريداري جي منظوري ڏني آهي، جنهن ۾ 7,000 کان وڌيڪ JDAM گائيڊنس ڪٽس شامل آهن، جيڪي اسرائيل جي غزه ۽ ايران سان جنگين ۾ استعمال لاءِ آهن. ٽرمپ انتظاميه چيو ته آمريڪا اسرائيل کي پنهنجي الڳ امداد جاري رکندو ته جيئن اهو پنهنجو دفاع يقيني بڻائي سگهي. اهو ياد رکڻ گهرجي ته آمريڪي صدر ٽرمپ غزه ۾ فوري جنگ بندي لاءِ اسرائيل ۽ حماس ٻنهي تي دٻاءُ وڌايو آهي، پر نتنياهو جو دورو ۽ 510 ملين ڊالر جو هٿيار خريد ڪرڻ جو معاهدو هڪ پيغام آهي ته آمريڪا خطي ۾ پنهنجو ڪردار برقرار رکڻ چاهي ٿو.