اسلام آباد:(آچر 20 جولاءِ 2025ع)حڪومت فعال طور تي اهڙن منصوبن جي نشاندهي ڪري رهي آهي جيڪي يو اي اي جي سيڙپڪاري لاءِ فوري نتيجا ڏين ۽ وزيراعظم شهباز شريف ان سلسلي ۾ 13 ميمبرن تي ٻڌل اعليٰ سطحي ڪميٽي پڻ قائم ڪئي آهي.
وزيراعظم شهباز شريف ۽ يو اي اي جي اعليٰ قيادت جي وچ ۾ تازين ملاقاتن کان پوءِ پاڪستان معيشت جي مختلف شعبن ۾ حڪومت کان حڪومت جي بنياد تي سيڙپڪاري کي راغب ڪرڻ لاءِ پنهنجون ڪوششون تيز ڪري ڇڏيون آهن.
هڪ اعليٰ عهديدار ميڊيا کي ٻڌايو ته تازي صورتحال کي نظر ۾ رکندي، وزيراعظم ڊپٽي وزيراعظم سينيٽر اسحاق ڊار جي سربراهي ۾ 13 ميمبرن تي ٻڌل اعليٰ سطحي ڪميٽي قائم ڪئي آهي. ڪميٽي کي شروعاتي طور تي اهڙن منصوبن جي سڃاڻپ ڪرڻ جو اختيار ڏنو ويو آهي جيڪي سيڙپڪاري لاءِ يو اي اي جي قيادت کي پيش ڪري سگهجن ٿا.
خاص سيڙپڪاري سهولت ڪائونسل (ايس آءِ ايف سي) 16 جولاءِ 2025 تي باضابطه طور تي ڪميٽي کي مطلع ڪيو هو، جنهن ۾ ناڻي، پيٽروليم ڊويزن، اقتصادي معاملن ڊويزن جا وفاقي وزير ۽ انهن جا لاڳاپيل سيڪريٽري شامل آهن. وزيراعظم جو نجڪاري بابت صلاحڪار پڻ ڪميٽي جو ميمبر آهي.
نوٽيفڪيشن موجب، اسپيشل انويسٽمينٽ فيسليٽيشن ڪائونسل جو نيشنل ڪوآرڊينيٽر پڻ ڪميٽي جو ميمبر آهي. ڊپٽي وزيراعظم جي سربراهي ۾ ڪميٽي جمعي 18 جولاءِ 2025 تي هڪ اجلاس منعقد ڪيو، جنهن ۾ سيڙپڪاري لاءِ تيار منصوبن ۽ جن جي فزيبلٽي رپورٽون بينڪ ايبل آهن، جي نشاندهي ڪئي وئي. ڪميٽي 7 ڏينهن اندر وزيراعظم کي پنهنجي رپورٽ پيش ڪرڻ جي پابند آهي.
0 تبصرے
Do not use vulgar language