خيبر پختونخواهه: پي ٽي آءِ، مسلم ليگ (ن)، پيپلز پارٽي ۽ جي يو آءِ جو سينيٽ چونڊون گڏجي وڙهڻ جو فيصلو

پشاور:(ڇنڇر 19 جولاءِ 2025ع)صوبائي حڪومت ۽ مخالف ڌريون جن ۾ جمعيت علماءِ اسلام، پاڪستان مسلم ليگ (ن) ۽ پاڪستان پيپلز پارٽي (پي پي پي) شامل آهن، خيبر پختونخواهه ۾ سينيٽ چونڊن ۾ پاڪستان تحريڪ انصاف (پي ٽي آءِ) جي باغي اميدوارن خلاف هڪجهڙائي تي اچي ويون آهن ۽ انهن جو رستو روڪڻ جو منصوبو تيار ڪيو آهي. معتبر ذريعن موجب، خيبر پختونخواهه اسيمبلي ۾ حڪومت ۽ مخالف ڌر پارٽين سينيٽ چونڊن ۾ پنهنجن 11 اميدوارن جي ڪاميابي کي يقيني بڻائڻ لاءِ خاص پينل ٺاهڻ جو فيصلو ڪيو آهي ۽ صوبائي وزير چار سرڪاري پينلن جي نگراني ڪندا. ذريعن جو چوڻ آهي ته حڪومتي ميمبرن کي وزيراعليٰ هائوس ۾ گڏ ڪرڻ ۽ اتان کان انهن کي وزيرن جي نگراني ۾ گروپن ۾ اسيمبلي ۾ موڪلڻ جو فيصلو ڪيو ويو آهي. ساڳئي طرح، مخالف ڌر جي پارلياماني اڳواڻ ٽن مخالف ڌر جي پينلن جي نگراني ڪندا. ستن پينلن ۾ شامل اسيمبلي ميمبرن کي هدايت ڪئي ويندي ته اهي جنرل، عورتن ۽ ٽيڪنوڪريٽ اميدوارن لاءِ الڳ الڳ ووٽ ڏين. معتبر ذريعن ٻڌايو ته خيبرپختونخواهه جو وڏو وزير علي امين گنڊاپور ۽ مخالف ڌر جو اڳواڻ ڊاڪٽر عبادالله سڄي عمل جي نگراني ڪندا. حڪومتي بينچن تان پنهنجي اميدوارن جي ڪاميابي کي يقيني بڻائڻ لاءِ مخالف ڌر کي گهربل ووٽ فراهم ڪيا ويندا. باغي اميدوارن کي ووٽ ملڻ جي صورت ۾ اسيمبلي ميمبرن جي سخت احتساب تي به اتفاق ڪيو ويو آهي. جيڪڏهن ووٽ سلپ ٿي باغي ميمبرن ڏانهن وڃن ٿا ته حڪومت ۽ مخالف ڌر گڏيل جاچ ڪندا. ذريعن جو چوڻ آهي ته سينيٽ چونڊن جي نگراني لاءِ پي ٽي آءِ جا مرڪزي اڳواڻ به اسيمبلي ۾ موجود هوندا ۽ مخالف ڌر جي اهم اڳواڻن جي به اسيمبلي ۾ اچڻ جي اميد آهي. مخالف ڌر جي ذريعن وڌيڪ چيو ته اسان حڪومت جي عزم ۽ قدمن کان مطمئن آهيون، اسان کي اميد آهي ته ڪو به مسئلو پيدا نه ٿيندو ۽ سڀئي 11 اميدوار ڪامياب ٿيندا. اهو فيصلو ڪيو ويو آهي ته ڪنهن به شڪايت جي صورت ۾ وڏي وزير ۽ مخالف ڌر جي اڳواڻ کي فوري طور تي اطلاع ڏنو ويندو ته جيئن بروقت ڪارروائي ڪري سگهجي.